臨近農曆新年，北上內地消費嘅朋友真係要小心，事關一街都係老千小偷，特別係深圳市區以外嘅地方，就算你嚟過多次，覺得好太平都好，一到年尾就會完全唔同晒，所以認真要提高警覺，而最多老友上當嘅，就係遇上換假鈔黨。
最常遇到嘅就係的士佬，佢哋唔係喺站頭等客，而係喺夜場門口，一嚟就問你去邊？如果你答佢所去目的地，佢哋就會開個優惠價嚟吸引你幫襯，當上車後就會同你猛吹水討你歡心，之後到達目的地，當你畀一百蚊佢哋時，就會摸一輪話懷疑係假嘅，要求換另一張，如果你不以為意再換一張，都會話係假，要求再換，一般換四五張就收手，其實你畀佢嘅張張都係真鈔，但係佢退回嘅就係假鈔，於是一程車，足足唔見咗幾百蚊，若果唔為意攞去夜場消費，仲可能惹嚟一身蟻添！
另一個就係細場或者快餐場，當你同囡囡飽餐一頓之後，囡囡會話代你去找數，於是你就會畀兩三百蚊佢哋，囡囡照例出外，但返嚟嘅時候，會同你講，當中有兩張係假幣，要求更換，客人不為意再換兩張，佢哋又會要求再換，總知唔換你三四張都唔會罷休。畀呢啲老千焗住劏到一頸血，好多老友都心有不甘，至於點樣提防，有資深師兄教落，換咗人仔時，最好用手機拍下號碼，萬一對方收錢後退回假鈔，就睇睇係咪自己嗰張，如果當中號碼有出入，最好快啲搵警察叔叔就最穩妥啦！
撰文：小德