家陣啲色情販子真係跟緊時代，好似最近湖南有間專科學校，因為浴室嘅熱水供應壞咗幾日，出現女生大排長龍嘅情景，照片被上傳網絡後，馬上就喺討論區出現「我想沖涼」嘅帖子，希望有人幫幫忙，可以畀女生們沖個熱水涼喎！
帖子裏面當然唔只沖涼咁簡單，有網友睇過報料，內容話自己學校冇涼沖，搞到一身汗味，好想搵個地方沖個涼，舒服吓，如果有男生可以幫忙，一定會投桃報李，好好報答對方；如果有男生想幫忙，就可以登入帖內嘅一個網址，裏面有個交友網嘅網號，男生只要再登入去，就可以聯絡到需要幫助嘅囡囡，囡囡會先自報身份，話自己係某某系嘅學生，今年只得十八九歲，身材火爆之類，男生要求照片時，對方亦會循例送上，而囡囡喺呢個時候，會強烈要求對方畀地址。
如果男生畀咗地址對方，咁就麻煩啦！因為囡囡會告之真正身份，就係上門色情服務，每次服務要二百至五百蚊不等，話明半小時後就到，男生講嘅如果係自己屋企或者宿舍地址，咁就好大件事，所以大多數都會再轉去附近旅館交易，但萬一男生拒絕對方提供服務，囡囡就會出言恐嚇，因為有咗對方嘅地址，話會派人喺度唱通街，屈啲男生幫襯，就算男生真係唔想幫襯，都要屈一兩百蚊交通費，呢個故事教訓大家囡囡就算冇涼沖都唔使嚟你屋企沖，所以勸大家唔好立心不良，否則只會中咗色情販子嘅圈套！
撰文：小德