最近日本風俗店出現爭拗，但講出嚟真係笑話一場。大家都知o架仔對OL造型情有獨鍾，但服裝就有兩種分別，一種係着制服嘅女社員，另一種則係着套裝嘅管理人員，其實兩種造型各有特色，咁都有得拗？
據當地成人雜誌報道，由於有客人去風俗店捧場，指明要囡囡扮OL，而囡囡為貪方便，着咗管理人員套裝出嚟，事後客人竟然投訴，仲喺網上炮轟呢間場呃人，於是店長就喺網上作出反擊。由於各有粉絲支持，形成兩批人，一批認為OL只限着制服嘅社員，因為佢哋身上嘅就係制服，而唔係便服，但有一批人就話管理人員造型嘅囡囡，先至係OL嘅最高境界，由於爭論咗好耐都冇結果，於是首當其衝就係風俗店紛紛要改OL嘅玩法，有啲索性分為制服社員同埋火辣高層兩大類。
有啲為免麻煩嘅風俗店，就索性取消OL服務，唔使畀啲客人詐型，等到事件爭論完畢後至恢復服務。由於日本風俗店好重視客人嘅批評，如果畀人投訴，就會覺得好冇面子，冇晒江湖地位，所以佢哋情願取消相關服務，都唔想畀客人搵到機會嚟大做文章。其實呢單嘢只係笑話一場，o架仔真係有啲鑽牛角尖，如果護士要分普通科護士同埋牙科護士，老師就要分學校老師同埋補習社老師，樣樣都分，真係乜都有得分，滿足客人需要係好，但千祈咪本末倒置呀！