傳媒爆內地妹孖咇兜搭醉漢洗劫，驚！查實呢種做法喺內地早已出現，我馳力王早就同大家分享過，到依家不只借醉行劫，更離譜到畀甜頭獵物劫完再屈。有師兄話早前去廈門旅行，夜間一條友去完酒吧飲嘢，步行回酒店途中，一個打扮似OL嘅女子從後趕上，直指對方跌咗手機，「逼」師兄取回。「個女人喺我後面衝埋嚟，拎住部智能手機話係我跌，根本部機就唔係我，但對方硬係要我取回，當時我見條街冇乜人，心生貪念就攞走咗部機，個女人就轉頭走咗！」玩家冇同女人多講半句，繼續向前返酒店，突然有兩個男人迎面而來，直指師兄偷咗部手機，二話不說就要搜身：「當時好亂，佢哋一衝埋嚟就搜身，結果喺我褸袋搵到部手機，然後話我偷機，斷正！」師兄話都知發生咩事，但對方攞回手機後堅持要報警，為免將事件搞大，師兄直接同對方傾條件，結果付五百元甩身！