巴士雄：各位師兄，真係要救救命，本人上星期去內地沙沙滾，點知好衰唔衰留咗張單據喺衫袋，結果返屋企畀老婆摷到，依家我講乜佢都唔信，仲話要同我離婚，其實男人逢場作戲好閒啫！我又唔係包二奶，使唔使咁嚴重先，請問有咩辦法補救呀！
的士高：鬼叫你滾都滾得咁大意咩，男人出嚟滾梗係要小心喇！依家斷正，真係唔知有咩辦法，惟有等佢落咗啖氣先，女人好多時都衰心軟，你畀啲耐性就得喇！
仙人掌：我就話唔係喇！女人哀莫大於心死，萬一佢真係對你死心，就非走不可，所以一定要打鐵趁熱，趁佢依家仲對你有情，一於用誠意打動佢，將副身家畀晒佢揸手，保證無下次，應該得架喇！
阿偉：嘩！咁咪仲慘過離婚，離婚都係分一半身家，依家要畀晒佢先得呀！不如算喇！依家咁多女人，使驚無老婆咩，男人四十一支花，離咗婚嘅中佬不知幾值錢，事關有好多中女待嫁嘛！