大家去內地玩嘅時候，不時都會發現啲女老千講到自己鬼咁可憐，希望呃你十元八塊，如果你上當，佢哋就會打蛇隨棍上，呃你一千幾百，佢哋花樣百出，防不勝防，但原來喺夜場中都有唔少呢啲囡囡，專門博取客人嘅同情心。
話說有唔少老友貪平，會去啲倉仔搵囡囡，啲囡囡嚟自五湖四海，只要肯開工就可以喺度掛單，供食供住，雞頭從不問囡囡來歷同身世，所以好多啱啱嚟到嘅囡囡都會選擇喺度開工，其中一啲女騙徒，亦喜歡喺度掛單，平時照做皮肉生意，咁啱撞正啲「水魚」，就會諗計呃多少使用，萬一條水魚入晒局，佢哋就會狠狠劏一大筆，跟手就消失，去另一個市鎮搵食。佢哋最常用手法，就係向客人大吐苦水，一般都係自小家貧書少讀，誤交損友墮風塵，之後一定係父母有病等錢執藥等等。
啲女老千講嘅時候會聲淚俱下，客人聽到啲咁感人嘅故事，最少都會畀多一兩百蚊小費，如果遇正個同情心爆棚嘅客人，仲會畀一千幾百添。之後，如果仲回頭搵佢哋，囡囡就會講個病要動手術，但要幾萬蚊，現在只籌得一半，心裏不知如何是好之際，若然客人同情心起，囡囡就會話想回家重新做人，不少人見囡囡回頭是岸都會鼎力相助，於是一兩萬蚊路費就會送上，埋單一計，一個客都屈幾萬，何況水魚唔只一個，所以遇上自稱身世可憐嘅囡囡，認真要小心呀！
撰文：小德