由於家陣內地租酒店房要實名登記，所以好多囡囡都唔肯同客人去開房，佢哋只有兩種選擇，一係兜搭啲有車嘅客人，同佢哋玩車震，唔係就只有帶客人去附近公園嘅草叢打野戰，聽落好似好吸引，但原來螳螂捕蟬，隨時背後有人將過程全部拍低。
話說長沙市內有個公園，每晚都有好多流鶯出沒，以前佢哋遇上客人，就去附近嘅賓館開房交易，但最近實施實名登記制後，囡囡一晚登記幾次，係人都知你做小姐啦！就算唔係即場斷正，但公安有你嘅記錄，萬一有行動，第一個就會將你繩之於法，為免誤墮法網，囡囡惟有改變策略，帶客人去公園內嘅草叢進行交易。講到打野戰，自然有唔少老友捧場，事件傳開後，唔少人都磨拳擦掌，蠢蠢欲動，由此而引起有關方面嘅注意，據講之前就拉咗十幾人，但並唔係妓女同嫖客。
原來被捕嘅竟然係一個勒索集團，話說佢哋得知公園成為賣淫熱點後，於是派出攝影師，配備夜視功能嘅相機，就喺公園內搵食，將一啲衣着光鮮嘅嫖客同流鶯喺公園內野戰嘅過程全部拍下，之後當客人同囡囡分手打算離開時，佢哋就好似旅遊景點嘅影相佬咁走出嚟要你買回照片，價錢當然貴好多啦！據報最平都一千蚊，有啲仲勒索幾萬蚊添，如果唔肯就範，照片就會放喺網上，嫖客為了息事寧人，大多數畀錢了事，好彩有人報警將佢哋繩之於法，所以奉勸大家夜遊時真係要小心呀！
撰文：小德