最近同個有間小髮廊嘅老闆娘食飯，佢話家陣啲九十後，真係好難教，我問佢發生乜嘢事？佢話：「啲囡囡又貪玩又恨錢，每日六點鐘開工，佢哋永遠唔會六點鐘就落嚟，情願喺網吧玩住等，好啦！有客人佢哋至施施然過嚟，揀啱嘅就開工，唔啱嘅又返網吧玩過，所以個場永冇囡囡喺度，有樣嘢好，就係唔怕畀人查，但客人行過以為你冇女，就唔會入嚟幫襯，所以家陣只能做啲熟客嘅生意，如果唔係就要出去門口嗌要唔要囡囡，真係嗌到喉嚨都發炎呀！」咁囡囡一接電話馬上過嚟都唔錯啦！佢話：「啲囡囡邊有咁上心，如果佢玩緊網上遊戲啱啱衝緊關，佢會衝埋關至過嚟，有時客人要等成半個鐘，本來你一個係咁，我咪搵另一個囉，但係個個囡囡都係咁，你真係奈佢哋唔何，好啦！有囡囡先到，客人當然唔會再等，到佢哋嚟到就會怪你唔幫佢哋留住個客，你話家陣做老闆，真係冇晒佢哋符呀！」