政府成日都話要擴闊稅基，早年就曾研究銷售稅，家陣又話加大膠袋徵稅。老實講，雖然小弟唔想交咁多稅，但係絕對唔反對擴大徵稅範圍，因為政府大家都有份，絕對唔可以只係得一部分人交稅。德國嘅波昂就厲害喇，最近佢哋將稅基擴闊到企街妓女層面添！早前波昂政府為咗向一班企街女收稅，喺合法紅燈區內設置多部「賣淫繳稅機」，企街女當晚要做生意，就一定要先去呢部機畀六歐元，換取即日許可證，咁樣至可以接客。大家唔好踩波昂政府連皮肉錢都想賺喎，因為收咗稅之後部分將會用於改善治安，以保障企街女嘅人身安全。
最近唔知大家有冇發覺，街頭巷尾都有好多區議員出現派傳單，甚至會踩上大家居住嘅大廈做家訪。佢哋頻頻出動嘅原因，咪就係為咗準備區議會選舉囉。其實如果佢哋想加強宣傳效果，小弟有一個建議畀佢哋，就係參考俄羅斯總統梅德韋杰夫嘅一班索女支援團喇！早前，呢班由妙齡女郎組成嘅支援團齊齊以短裙仔上陣，為總統打氣，並且大派甜美嘅士多啤梨，成功引起市民以及傳媒注意。如果區議員又可以照做的話，咁咪可以輕易谷起人氣囉！
撰文：賢