近年唔少父母為咗鍛煉細路哥嘅意志同體魄，都鍾意送啲塞豆窿去軍訓營，估唔到唔單止為人父母會咁做，美國唔少四仔片商，都鍾意送啲新進脫星去另類軍訓營。佢哋咁嘅安排，唔通想操班脫星去打仗？
美國佛羅里達州最近出現咗一個，專為索爆脫星而設嘅軍事訓練營。每個入營嘅脫星，除咗清一色係四仔界新丁外，仲要樣靚身材正，真係令人摸不着頭腦！可能有人覺得，呢啲所謂軍訓營，只不過係噱頭嘢，內裏係度假營而已。如果咁諗嘅話就大錯特錯喇！事關睇番呢個軍訓營嘅訓練項目，同一般軍訓營差唔多，不但有步操訓練，仲有拯溺、射擊、攀崖等軍事訓練項目，真係少啲體力都頂唔順！
既然咁辛苦，莫非四仔片商想收買人命？有份送脫星入營嘅片商表示，佢哋之所以送班女入營，目的並非想操到班新進脫星散晒，而係想透過呢個機會，堅定班脫星嘅意志，同埋提升佢哋嘅團隊精神。原來唔少片商發現，好多新進脫星性格懶散，做嘢唔積極，拍攝時又唔鍾意同人合作，為咗提升佢哋嘅積極性，於是就送班新女入營，等班教官操Fit佢哋。第日演出時更加有態，同埋唔會郁啲就話退役喎！
其實呢個專為脫星而設嘅軍事訓練營，同一般嘅軍事訓練營都係有啲差別，訓練強度冇咁高之餘，訓練期亦冇咁長。而課程主要分為三種，分別係三日、五日同七日，視乎有關片商嘅要求而定。雖然片商操班脫星嘅出發點正確，但唔知班女又受唔受呢？有曾經參加過軍訓營嘅脫星Jenna Sweet就指，軍訓營不但讓佢嘅意志得到提升，更有助練出激凸嘅身材！
Jenna解釋：「喺入行前，我其實係個冇乜目標嘅人。自從入營後，經過一輪艱苦訓練，我慢慢堅定咗喺四仔界發展嘅信心，並為將來成為四仔導演而努力。另一個意想唔到嘅得着，就係我嘅身材，喺強度十足嘅訓練過程中，居然變得前凸後趷，小肚腩不翼而飛，實在令我喜出望外！」據講呢個軍訓營，家陣唔單止招呼脫星，仲會招收男優入營，務求可以操到佢哋爆肌又夠Man。唔知日本AV界，會唔會考慮將呢個課程，納入男女優嘅訓練課程度呢？
撰文：峰魂簫