負責喺夜店舞池跳舞嘅Dancer，內地稱之為「領舞員」，任職嘅全部都係十零廿歲嘅囡囡，其中唔少都係舞蹈學院學生，經朋友介紹入行。大家以為跳吓舞就有錢收，聽落好易做，但實際情況卻唔係想像中咁好，好多時仲要犧牲色相添！
喺內地的士高工作嘅領舞員，表面風光，但內裏坎坷，收入方面跳足成晚都只得百幾蚊嘅底薪，就以番禺幾間大型的士高場為例，唔少領舞員除咗跳舞之外，休息時仲要埋吧枱幫手賣酒，有客人撩你劈酒就要坐低迎戰，從中賺取微薄嘅酒水佣金。
但一到佢哋出場，又要上台再跳過，飲到一肚啤酒，仲要搏命咁跳，你都咪話唔辛苦，除非好彩有貴賓房嘅客人搵佢坐枱，咁就可以唔使跳舞，專心做三陪，但入得房就要預咗畀人客毛手毛腳兼抽水，所以有啲有骨氣嘅囡囡，情願坐大廳都唔肯入房。
當入房陪客玩，萬一客人高興，要囡囡繼續有下文，都要奉陪到底，如果喺呢個時候話唔制，就要出動老總嚟賠罪至拆得掂，所以入得房嘅領舞員，都基本上會有下文，呢一個關口，唔係咁多囡囡接受得到，但只要一突破到，佢哋好快就會索性下海做小姐，唔使跳舞咁辛苦，齋坐賺小費好過，但點解有啲囡囡仲肯堅持做領舞員呢？因為佢哋大多數都係舞校出身，覺得自己經過多年辛苦訓練，出嚟唔做跳舞會好浪費，由於生活逼人，好多囡囡捱得一年半載後，都會忍唔住選擇下海。
若然堅持做領舞員，仲有一個希望，就係想畀人睇中加入全職舞蹈團。但嗰啲所謂嘅舞蹈團，好多都係幌子，轉頭都係呃囡囡去做色情服務，所以佢哋浸得日子愈長，就會愈明白世途險惡，夢想一旦幻滅就會認真地去生活。
如果肯客串做三陪，月入就會多幾千蚊，但都係杯水車薪，睇見身邊嘅囡囡，坐喺度輕輕鬆鬆就有過萬蚊嘅收入，佢哋好多都會放棄理想，毅然轉投小姐行列，所以好多夜場會大量招請領舞員，睇吓佢哋捱得幾耐，最後又會成為夜場嘅生力軍。
撰文：小德