由於今日係公眾假期嘅關係，忙咗成個月嘅魯爾終於可以休息，所以瞓到中午時分都仲未捨得起身。不過，正當魯爾仲對大床難捨難離嘅時候，突然有人猛咁拍門，隨後傳來一把女仔聲話：「救命呀！救命呀！我屋企有火災呀！」魯爾怕唔幫手救火會燒到埋嚟，於是即刻起身去開門。開門之後就見到對面屋嘅美少女莉娜神情慌張，而莉娜仲二話不說拖咗魯爾入佢屋企廚房。去到之後，魯爾至發覺原來只係莉娜個焗爐因為焗燶嘢而冒煙。魯爾見狀，打開焗爐，再用毛巾包住隻手將裏面嘅曲奇連焗盤一齊掉落洗手盆，期間魯爾一個唔小心將手指燙傷咗。莉娜話：「真係唔該晒你呀！你隻手指辣親喎！」講完之後就捉住魯爾隻手指放入口啜。