夏季到咗天天曬太陽，但又唔想曬到膚色一截截嘅話，好多人都想剝光豬嚟個裸曬。想喺香港裸曬，好易招人話柄。與其係咁，倒不如去外國嘅天體海灘，安安樂樂咁曬好過！不過全世界天體海灘咁多，究竟去邊度好呢？咁就梗係去位於西班牙伊維薩島，一個名為Playa d'Es Cavallet嘅裸體海灘啦！
呢個海灘點解係裸曬愛好者嘅首選？原來裸體愛好者協會，早排喺全球五十個國家，千幾個裸體海灘中，選出十個最佳嘅裸體海灘，而Playa d'Es Cavallet就以最高票數，成為全球首選！呢個海灘之所以奪獎，最大嘅原因係因為佢係一個合法嘅裸體海灘，換言之，裸體愛好者喺度剝光豬裸曬、游水、玩沙灘活動，都唔使擔心會畀人拉！
此外，伊維薩島本身係位於地中海西部嘅一個海島，出名水清沙幼，難怪Playa d'Es Cavallet會成為全球最佳嘅裸體海灘啦！
撰文：阿豪