早排講起有個朋友B好長情，好鍾意翻啅一個囡囡，結果囡囡開聲叫佢送手袋，而朋友B又唔制，就咁斷咗纜。有人就話唔好講到啲女咁貪，因為有啲玩家又真係可以同囡囡擦出愛火，叫我唔好因為以前曾經沉過船，就一竹篙打一船人咁話。其實唔單止我係咁睇，好多人都曾經遇到一啲相當現實嘅囡囡，好似我早幾日又遇到單料，可以同大家分享一下！
話說朋友C佢好鍾意去唱K，經常滾嘅佢梗係留定幾個飯盒備用啦！早前佢就識咗個K女，對方同佢交換咗個網上聊天工具嘅冧巴後，兩人就經常上網傾偈，平時仲約出嚟食飯、行街同睇戲。出咗嚟幾次，有晚囡囡就喺網上同朋友C講，話佢個手袋畀人搶咗，裏面有成幾萬銀，而呢啲錢係用嚟畀佢屋企人醫病。K女就問朋友C可唔可以借錢畀佢嚟應急，等佢返嚟後再還番畀佢。朋友C問囡囡有冇報警，K女話以佢身份好難報，仲叫朋友C快啲匯錢畀佢。朋友C冇諗清楚，就借咗萬幾銀佢，結果囡囡梗係冇咗影啦！
你哋可以話朋友C蠢，但係亦唔能夠唔小心，現實中真係有啲女好貪心，故此出得嚟玩，最重要就係要理性！
撰文：大軍