天氣漸漸炎熱，連我哋外出飲食嘅模式都要隨之而改變，好似踎大牌檔打冷啦、打邊爐啦，就連小弟最鍾意嘅韓式燒烤亦要忍一忍口，因為全程圍於爐邊實在太熱，而且相當熱氣，搞到自己一把年紀面上仲生滿暗瘡，咪盞畀人笑！不過，如果香港嘅燒烤店好似東京呢間燒肉店一樣，就算店內冇冷氣，我都一樣會日日幫襯。
呢間赤坂燒肉中心位於東京赤坂區，除咗賣燒烤食品，亦有賣日式咖啡，當然亦唔少得大大杯嘅冰凍啤酒啦。不過，最吸引男人幫襯嘅，並唔係店內嘅食物，而係一眾女侍應，呢班女侍應個個都青春無敵，兼以熱褲上陣招呼客人。最抵死就係女侍應無論捧餐定係應客人召喚到來，總係行到搖風擺柳，好似行緊天橋騷一樣，令男客人個個都睇到流晒口水。
其實，赤坂燒肉中心嘅女侍應，大部分都係活躍於潮流雜誌嘅兼職模特兒，所以經常難抵強烈表演欲發作，咪搞到招呼客人好似做騷咁囉。不過，唔緊要，相信一眾男客人絕對冇投訴。
撰文：賢