近年美國舉辦嘅大型狂野派對，都同贊助商有住千絲萬縷嘅關係，但大多數贊助商都係酒商或者網站，乘機做吓宣傳。而最近喺美國加州，就有人搞咗個狂野派對，贊助商竟然係間牛仔褲公司，咁佢哋又用乜嘢橋，吸引大家參加呢？
據呢次活動嘅負責人卓娜透露，起初接咗呢個活動嘅時候，真係十分頭痛，因為客人要求搞一個牛仔褲之夜，仲要所有客人着牛仔褲嚟參加派對。呢一點絕對係冇問題，但要佢哋着同一牌子嘅牛仔褲，咁就比較困難，卓娜開會開咗三晚通宵，都冇結果。
最後，卓娜仲一時大意將咖啡淋咗落條牛仔褲上面，焗住要換褲，呢個時候竟然畀佢諗到條橋喎。卓娜話：「我同贊助商講，保證所有人走嘅時候都會着住佢哋牌子條牛仔褲離開，老闆聽見當然開心，仲增大資助，要我哋畀心機去做好今次派對。」
至於卓娜有啲乜嘢橋，暫時先賣個關子！講番卓娜多咗資金去辦派對，於是搵嚟最勁嘅樂隊負責現場音樂，仲搵定大量靚仔靚女，喺現場帶動氣氛，最重要就係買啲最新電子產品，用嚟做遊戲嘅獎品，據講唔少年輕人都係為咗攞獎品嚟參加。
由於卓娜係搞狂野派對嘅專家，佢手下大把燈頭負責銷飛，所以賣票一啲都冇問題。而當大群年輕男女，準時出現會場，先嚟成個鐘狂歌熱舞，令佢哋熱晒身，之後就玩遊戲，其中一個就係最性感迷你裙，要囡囡即場剪褲變為迷你裙，夠晒性感。
嗰晚派對有幾百人出席，有廿零三十個囡囡參加咗剪褲遊戲，佢哋全部都剪到條牛仔褲爛晒，點樣返屋企呀？於是卓娜安排特價牛仔褲出售，所以你剪到條褲幾爛都唔使驚，馬上有得替換。但卓娜應承過要幾百人都換上，唔知佢仲有乜嘢方法呢？
之後卓娜大玩冰水淋身嘅遊戲，本來係自願參加，但卓娜搵嚟靚女真空參與，令會場氣溫高升，引起全場哄動，最後更由靚仔出手大玩水槍，搞到全場無論男女都濕晒身，焗住要一人幫襯一條牛仔褲，老闆事後拍爛手掌，仲加碼要求卓娜全國咁搞。
撰文：小德