隨住香港最後一間成人戲院關閉，成人戲院已成為香港嘅歷史。不過喺外國好多地方，仲有唔少成人戲院存在，而呢間位於美國三藩市，名為O'Farrell Theatre嘅劇院，就係當地歷史最悠久嘅成人戲院。
呢間成人戲院喺1969年，由Mitchell兄弟成立。唔講唔知，原來呢兩兄弟其實係鹹片製作人。不過當年好多地方，都有法例規定唔可以拍鹹片，後嚟佢哋發現三藩市呢個地方，並無有關法例，於是就買咗當地一間名為Condor Club嘅夜總會，並改名做O'Farrell Theatre。佢哋開設咗呢個地方後，就將二樓改成拍鹹片嘅製作室，然後喺樓下戲院度放映。雖然當時嘅反對聲音唔少，但兩兄弟仍然繼續播片。
由於當年唔係好多地方公然播鹹片關係，故此就成為男士集中地。呢兩兄弟亦相當有諗頭，間中會請著名四仔女星嚟做宣傳，仲吸引唔少名人撐場添！其後兩兄弟開始將戲院改革，樓上播鹹片，樓下則變成脫衣舞場用以增加收入。
到咗1986年，兩兄弟決定摺咗戲院，索性變成只做脫衣舞表演嘅脫衣舞場。雖然經過咁多年，而且入場費從二十美金起，但仍然有唔少玩家捧場。不過話說回來，唔知佢第時會唔會播番鹹片呢？
撰文：阿豪