喺廣西梧州巿，好多人都喜歡幫襯「舖妹」。乜嘢叫「舖妹」呀？聽完老友講清楚至明白，所謂「舖妹」嘅全名叫做「舖仔妹」，「舖仔」即係類似香港嘅士多，而「舖仔妹」就係裏面嘅囡囡，客人睇啱就可以帶呢啲囡囡出街。
聽落同髮廊差唔多，形式係差唔多，但呢啲「舖妹」只會同客人行吓街，食吓飯，至於想有下文就要多啲捧場至有機會。據老友講，喺好多大酒店附近嘅橫街，都會有呢啲「舖仔」，裏面經常有五六個妙齡囡囡坐喺裏面，不時向途人送秋波。
途人如果睇見合眼緣嘅囡囡，就會上前搭訕，熟客就識得主動約囡囡出街，如果係第一次，囡囡會主動問你去邊，佢哋會落足嘴頭話邊度好玩，邊度多嘢食，客人聽見自然想去，當準備邀請囡囡作伴時，佢就話要看舖唔走得開。
正當客人失望之際，佢哋就會畀個選擇客人，就係可以請假陪佢哋出去玩，但要搵人頂替自己就要畀一百蚊，咁少錢客人自然會代付，呢個時候囡囡又會打蛇隨棍上，話陪佢出去玩，咁今個月就會少咗兩百蚊勤工獎。嚟到呢個時候，客人當然亦會照額補償。
於是客人放低三百蚊，就可以同囡囡出去把臂同遊，一直玩到十一二點，囡囡就會走人，如果客人想再有下文，囡囡通常都會婉拒，萬一真係好需要，佢哋會替客人安排小姐上房，質素當然差啲，而且要另外再畀肉金，大約二三百蚊。
咁呢啲舖妹真係只做伴遊？原來又未必，因為佢哋一早就問定客人會留喺當地幾多日，佢哋想客人日日都搵佢哋陪，例如客人嚟四日，佢哋日日賺三百，都幾和味，而且最重要就係吊高嚟賣，如果客人真係搵佢哋陪足四日，話唔定最後會有驚喜。
由於囡囡係伴遊身份，唔係一般嘅小姐，而且大家玩咗幾日，點都有啲感情，最後一晚如果肯留低陪你，你估值幾多錢吖？起碼都千千聲啦！有囡囡就曾經收過一萬蚊小費，一般囡囡過夜要收一兩千蚊，所以呢招放長線釣大魚方法，真係好有用。
撰文：小德