天體愛好者之所以鍾意剝光豬，目的就係希望能夠讓身體緊貼大自然，從而達到減壓同鬆弛神經嘅效果。早排美國就有裸體網站進行選舉，讓全球天體愛好者，選出最具鄉村氣息嘅天體營，結果由呢間位於英國嘅Eureka Naturist Club奪得。
呢間天體俱樂部嘅特別之處，在於佢有超過百分之九十嘅地方，都係草地同樹林。據有關方面介紹，呢種設計特別好多，主打陽光與海灘嘅天體營，而佢哋之所以保留咁多綠色植物，就係希望天體愛好者，能夠真正置身大自然之中。為咗能夠貫徹親近大自然嘅宗旨，俱樂部內冇豪華嘅酒店或會所，愛好者反而會入住極具農村氣息嘅木製村屋。至於娛樂方面，裏面嘅康樂設施相當齊全，當中包括桑拿浴室、泳池、足球場、桌球室、夜總會等，入到去保證唔會覺得悶！
天體愛好者除咗怕地方唔好外，仲會擔心場內人氣唔夠，冷冷清清咁，自然玩得唔開心。不過呢間天體俱樂部卻保證唔會有咁嘅事發生，皆因佢每日都會有超過百二名愛好者入住，而到咗周末，更有多達三百人去玩，人氣絕對有保證。至於入住嘅愛好者嘅年齡，主要從十八至三十歲左右，加上佢哋經常舉辦各種派對活動，對於鍾意裸體同參加派對嘅人嚟講，呢度絕對係一個好選擇！
撰文：阿豪