射箭可謂一種鍛煉眼界同耐性嘅運動。但喺美國新澤西一個射箭場內，訓練嘅唔係射箭運動員，而係在旁欣賞嘅男人！
有指呢個射箭場本來開張時係專為培訓有意玩射箭嘅男女，之不過參加者以女士佔大多數，同時吸引咗不少齋睇唔幫襯嘅男士入場瞄嘢。梗係啦，呢個係一個戶外射箭場，熱辣辣陽光底下曬住射，囡囡香汗淋漓，全身濕透，男人肯定大飽眼福啦。
場主為咗唔益班麻甩佬，就諗咗條屎橋出嚟，推出情侶訓練射箭班。美其名曰培養雙方共同興趣及增長感情，實情就係趕啲搞搞震瞄嘢男至真。所謂訓練班同平時無分別，只在於女士上場射箭，而男方就站喺女友身後負責計分。哈！呢招果然賤到冇朋友，場主搵男友充當計分員真正目的，正係唔畀機會佢哋瞄其他囡囡，加上隔籬嘅射箭囡囡身後亦有「狗公」站崗，試問邊個夠膽亂瞄先。
而最陰毒係，參加嘅囡囡都知道呢個射箭訓練想測試男友嘅忠誠度，藉住長期訓練，令佢哋唔好再亂瞄女仔。好在，香港連球場都唔多個，否則搞埋啲咁嘅場，班女人肯定晚晚收工去射箭啦！
撰文：祖