人就係咁奇怪，提起返工返學可能會覺得成身冇力，反而講到去溝女去飲酒去派對，就會渾身是勁。不過，任你精力幾旺盛都好，去派對成晚郁身郁勢都會能量盡耗，唔知係咪咁，所以荷蘭有個超大型狂野派對，就安排咗大床畀玩家休息，而且仲方便氹女上床。
提到荷蘭，大家可能會諗起足球名將古烈治、雲巴士頓，及至近年嘅飛翼洛賓同雲尼斯達萊。不過，若然大家去過荷蘭嘅阿姆斯特丹，就會被佢哋嘅紅燈區所吸引，因為佢哋嘅紅燈區有好多櫥窗女郎，為咗吸客絕不介意以內衣上陣。當然，除咗櫥窗女郎，阿姆斯特丹仲有好多值得遊覽嘅地方同活動，好似Ex Porn Star Party就係最佳例子喇！呢個派對由2000年開始出現於阿姆斯特丹紅燈區，目的好簡單，只係搞個派對畀大家狂歡咁單純。而為咗令派對更有噱頭，主辦單位就搵到美國知名男優Ron Jeremy做策劃人，除咗貪佢名堂夠響有叫座力，仲可以借佢之手搵來四仔女星撐場。
自從由Ron Jeremy協力主辦呢個派對之後，果然令好多四仔迷慕名而來，之後就愈來愈多人參加，無他嘅，好多人都想於派對當中，同四仔女星見面，溝通溝通嘛。事實上，到場嘅四仔女星絕冇欺場，除咗樂於通場走，仲擅於四圍獻酒，令一眾男嘉賓為之迷醉。四仔女星除咗親自招呼男賓，亦會上舞台大跳脫衣舞，令台下嘉賓High到震。另外，如果嫌女星嘅脫衣舞唔夠專業，舞台上亦有一班專業舞孃勁舞娛賓。若然仲話唔夠好睇，單位亦會開放舞台，等男女賓客上台自己跳，而且仲提供埋一套肉色緊身衫，着上之後，睇落就好似全裸演出咁，即使舞姿麻麻，台下觀眾亦唔會柴台。當然，如果夠開放，真係剝光豬上去跳舞亦冇人會反對。
整個派對不乏節拍強勁嘅音樂伴奏，即使係跳舞白癡，飲大兩杯亦會跟隨節奏起舞。而跳足一晚，就算你事前休息咗成個星期，都會發覺能量耗盡，但係呢個時候發現仲有好多四仔女星同索爆舞孃即將會登場，點算好呢？冇問題，因為場內設有一張大床可供使用。不過，呢張寬敞又舒適嘅大床最佳用途並不止於休息，最主要係畀嘉賓帶埋女伴上去談心。有大床之助，大家就可以舒舒服服咁把酒暢談，即使大家只係啱啱見面，但係傾偈傾到上大床，感情自當一日千里，呢個設計真係掂過支電燈柱呀！
撰文：賢