早排收到老友電話，問大軍有冇興趣去遠啲地方嚟個過夜團。問佢有幾遠，佢就話係DG喎！DG雖然係遠少少，但過夜團就冇乜問題，跟住佢就話要帶埋幾個師弟出山，問大軍有冇問題。須知道呢位老友食開夜粥，聽到佢咁講梗係No Problem啦！
到咗約定時間，老友就介紹幾個朋友，點知聽到佢哋個名，就覺得奇怪，乜佢哋個名咁似啲網名嘅？呢個時候至知，原來所謂師弟，並非係一齊學功夫嘅同門師弟，而係網上識嘅網友喎！呢幾個「師弟」就話，一直以嚟都想北上見識，但又冇人識路，咁啱識咗老友，就搵佢帶路上嚟學嘢，仲請大軍多多指教咁話。
可能有人覺得，同啲三唔識七嘅人去玩，好似有啲唔多好。因為去玩去蒲，都係搵啲熟人齊齊玩至啱Key。不過大軍就唔係咁諗，事關多啲新人一齊玩，好易會有新刺激，而且帶住呢班新仔出山，見到佢哋玩得「合皮」都會有種滿足感，尤其係第時見到佢哋變晒做師兄，帶住班師弟去學嘢嘅話，真係有種薪火相傳嘅感覺o架！其實男人就係咁奇怪，平時同佢講工作、講政治，未必會有乜嘢話題，但係講到去玩，大家好快就打成一片，呢種感覺真係幾過癮！
撰文：大軍