法國人生性浪漫，但同時又好戇居，點解？事關早前美國媒體選出全球十大最Cool高爾夫球場，位於法國西海岸，靠近波爾多嘅拉傑尼高爾夫球場亦榜上有名。
呢個宣稱係世界上唯一最貼近大自然嘅天體高爾夫球度假村，雖然並非錦標賽場，而且只得六個窿，包括四個三桿洞及兩個四桿洞，之所以入圍毫無疑問係因為打波「必須」裸體上陣有關，該場更為初學者提供專業教練，任何水準嘅高球愛好者都可以入場玩。
全裸以外，場主亦有四大規條：一，每位入場男女，必須尊重裸體，剝清後不准扭扭擰擰覺得尷尬，否則會勸喻離場（似乎佢當每位入場人士都係職業脫星，要習慣裸體，更有職員全程瞄實！）；二，不准刻意向他人展現波哋（借問聲如何界定刻意，莫非走近陌生人講波經係有心賣弄身材？）；三，在場內要節約用水，但入場前必須徹底沐浴（又要人慳又要人沐浴，至矛盾係你囉！）；至於最爆嘅一項，係該場禁止在公共場合發生任何性行為，各種玩具亦不得攜帶入場內，且不許拍照。
唔畀影相係私隱問題，之但係「強迫」男女裸體打波又唔畀搞嘢，咁即係引人犯罪啫？至於場主所指嘅玩具，我諗一定係指性玩具，怕你攞去自娛，騷擾他人比賽，咁戇居嘅高球場，你有冇興趣去開吓眼界呢？
撰文：祖