相信唔少老友都睇過色情小說，故事裏面嘅情節，就算唔係親身經歷，都一定係自小睇慣鹹碟長大嘅宅男，但如果話畀你知，你睇嘅色情小說，竟然係美少女所寫，而且當中有部分連性經驗都冇，你係咪覺得好出奇呢？唔使驚奇，因為真有其事！
最近內地公安喺鄭州搗破咗一個色情小說網站，由於網站內大部分小說嘅內容，都十分出位，而且有啲仲牽涉到暴力同血腥場面，所以被有關方面發現後決定採取行動取締，而喺網站內涉及嘅色情小說作品，竟多達1500篇，數目認真唔少！
而大家又估唔估到，呢啲色情小說，係由乜嘢人寫嘅呢？相信大家第一個印象，若然唔係出自好色大叔，就一定係宅男之手，但原來佢哋加埋佔一半都冇。據有關方面調查，發現跟網站簽有合約，定期供稿嘅作家，大約有三十二人，而超過一半以上，竟然係女性作家，而最令人驚訝嘅就係，當中全部都係廿來歲嘅小姑娘。
據資料指出，最細嘅一位作家，今年只得十七歲，其他都係二十出頭，事件曝光後，大家都十分驚訝，點解後生細女走去寫鹹濕小說呢？唔通可以搵到好多錢？答案係搵唔到錢嘅！原來佢哋嘅作品，唔使成本寫好晒至推出，只要寫一章就可出一章。
網站按照讀者反應，如果好嘅就可以寫落去，唔好嘅就會抽起，汰弱留強，之後再同作家逐章計錢，一般情況，三至四十章左右，就可完成一輯完整作品，而每一章嘅報酬，原來只得十零廿蚊，寫好成本小說，都只得五六百蚊嘅報酬，真係少得可憐。
咁少錢佢哋又做？據班後生女講，佢哋都係寫小說嘅發燒友，曾經正正經經寫小說，但係讀者反應一般，啲正經網站見讀者冇反應，出得幾期就會將你抽起，但放上鹹網，讀者反應超強，負責人好快就同你簽約，好有成功感。
呢班女作家嘅鹹古，據講都有唔少讀者捧場，有網友指出，負責人藉此賺大錢，牟取暴利，理應接受法律制裁，但女作家們又唔係為錢，只係為咗理想同興趣，絕對係情有可原。但如果佢哋唔再寫色情小說，唔知班網友仲會唔會繼續支持佢哋呢？
撰文：小德