小弟都幾怕天黑，因為照唔到陽光，心情硬係唔多舒服，再者，得唔到陽光嘅溫暖，成個人都空虛寂寞兼且凍啊。不過，自從我從內地電視劇集發現吳婷，就算天黑都唔怕喇！畢業於中央戲劇學校嘅吳婷，順理成章進入演藝界做演員，由於阿妹樣子斯文大方，氣質溫柔婉弱，所以深受電視台欣賞，劇集長拍長有，好似《新碧血劍》、《龍票》、《關西無極刀》咁，吳婷都有參演。另外，除咗做演員，吳婷仲識唱歌兼做模特兒，喺舞台演出嘅時候又唱又跳相當活躍，做模特兒嘅時候就鍾意露出招牌笑容，甜到漏之餘仲充滿陽光氣質，睇完之後，令人心裏面湧現一股窩心溫暖，猶如沐浴喺陽光中一樣！大家上吳婷嘅博客就可以感受得到喇。