早排聽到一個駭人聽聞嘅消息，就係有啲夜總會，會翻用啲客食剩嘅果盤！話說有晚同班老友齊齊北上合皮一番，去到夜總會坐低，就叫個相熟經理入嚟，諗住吹吓水兼八吓行情。呢個時候服務員循例拎個果盤入嚟，經理突然同我講，話呢個果盤保證新鮮，絕對唔係翻兜嘢。我同佢講：「乜果盤都有翻兜嘅咩？」經理就同我講：「梗係有啦！家陣內地乜嘢都貴，就連生果都貴晒。有啲夜總會為咗慳成本，就將啲客食剩嘅生果撈埋一碟，扮做新鮮果盤再推出去。萬一食剩嘅話，又再翻兜，再包裝成新果盤推出嚟。咁樣既環保又慳成本，梗係咁做啦！」
經理同我講，如果去到夜總會，見到個果盤上嘅菠蘿片，塊塊綑晒啡邊，而啲蘋果同車厘茄，更係黑咗一撻撻，就知佢唔新鮮，千祈咪食喎！班老友聽到經理咁講，即刻眼都凸埋。問佢哋做乜咁嘅樣，佢哋就話原來上個禮拜，至喺間夜總會食咗啲有怪味嘅果盤。家陣諗番起，都唔知係咪呢啲食剩嘅果盤，真係乜嘢胃口都冇晒！
撰文：大軍