小弟以前住公共屋邨，好多時都會撞到邪嘢，但自問未黑得晒，未至於時運低到撞到人類嘅殘餘能量，所講嘅邪嘢係指其他屋村住戶嘅胸圍同底褲啫！因為當時住屋空間唔多，好多住戶都要將洗完嘅衣物、床單拎出露台晾，所以周不時行過都會撞到正。猶幸當年我仲未開始投身博彩生涯，否則一定會向衣物擁有人興師問罪。
不過，如果大家去到新西蘭一個叫做Cardrona嘅地方，興師問罪都冇用喎，因為呢度有一道長長嘅鐵欄掛滿晒胸圍，要追究都不知從何入手。
點解咁多人掛胸圍上去呢？原來正係來自四個女人嘅無聊行徑。1998年嘅聖誕節當日，有四個女人行過呢道圍欄，唔知點解突然一齊除低胸圍再掛上去，自此之後，四個胸圍就被傳媒報道到街知巷聞，繼而惹來市民圍觀，仲有女士覺得過癮，有樣學樣，將自己嘅胸圍加上親筆簽名掛上圍欄。雖然，早前有關當局就以影響交通安全為由，將總數約為千五個嘅胸圍移除，但係仲有唔少人繼續將胸圍掛上去。
撰文：賢