唔少玩家去夜總會玩，都會將飲剩嘅酒存起嚟，等下次嚟玩嘅時候，可以拎番出嚟飲。不過原來有啲冇良心嘅夜總會，會偷偷地將客人存起嚟嘅酒，倒咁啲出嚟，溝成一支新酒出嚟畀玩家飲，而原來嗰支酒，則會加番啲水或其他平價酒落去，等玩家唔驚唔覺以為仍然係原本嗰支酒。
話說有老友存咗支酒喺某夜總會度，因為好耐都冇返過去玩，所以趁住呢排比較得閒，上去攬女兼歎埋支酒。點知入喉時發覺支酒勁淡，問經理點解會咁。對方就話啲酒開封擺得耐，冇晒酒味唔出奇。不過老友都係好酒之人，深知就算支酒封得唔好，最多係酒味冇咁重，冇理由會變淡，於是質問個經理，而最後都係冇結果。佢打電話問我點解會咁，我就同佢講話呢啲情況通常會出現喺啲貴價酒度，而今次溝水已經算好彩，若然對方換支假酒畀你，飲咗之後嘅後果則可大可小。老友聽到我咁講就話要人哋賠，但你又冇憑冇據，點叫人哋賠畀你呢？更何況你嘈得幾嘈，人哋玩嘢你就麻煩啦！故此去夜總會開靚酒，一係去有信譽嘅大場，一係走嘅時候拎埋支酒走，咁就至安全嘞！
撰文：大軍