話說我有個老友，佢以前曾經沉過船。當年佢本來諗住同囡囡雙宿雙棲，點知住落一排後，至知道囡囡原來鄉下有老公，搞到佢身心受創。以為佢會經一事長一智啦！殊不知早一個月前，發覺佢經常北上，原來係為咗個新相識嘅囡囡。問佢唔怕重蹈覆轍咩？佢就擰晒頭話，今次早就做晒功課，唔單止起晒囡囡個底，仲已經見埋對方家長，然後佢仲好冧咁，拎咗張同佢囡囡嘅合照出嚟，騷畀我睇。
見到老友咁冧，雖然我唔相信歡場有真愛，但作為朋友嘅我，亦無謂多講，惟有祝佢好運。早排收到佢電話，佢喊晒口同我講，話原來囡囡曾經生咗個仔，問我好唔好再繼續落去。須知道佢已經排晒期，諗住同囡囡喺內地拉埋天窗。呢個時候至知道有細路呢件事，心情唔好就梗o架喇！最慘就係唔知點同父母交代，睇嚟老友今勻真係有排煩！呢一刻對佢最大嘅考驗，唔係話點樣養仔，而係問吓自己究竟有幾愛對方！
撰文：大軍