近期天氣涼咗少少，所以成日同班兄弟一齊去食日式火鍋，唔係貪佢夠潮，而係貪日式火鍋必定可以食到小弟至愛嘅大葱。好多兄弟都話唔敢食，話大葱太辛辣，不過我就篤住佢哋個鼻話：又唔係叫你生食，怕乜呀！滾熟咗嘅大葱香味撲鼻，而且甜美可口，半點辛辣都冇，最重要仲係大葱有驅寒壯陽之效。秋冬嘅寒氣往往會令人覺得手足冰冷，烏龜天冷都會冬眠啦！如果自己身體寒，細佬亦自然懶得蒲頭，大大影響雄風。不過，食過大葱就冇有怕！中醫都話大葱屬性溫熱，有暖胃驅寒之功，而且能夠帶旺血液流動，促進血氣循環，方便令血液流動到想去嘅地方，換言之有壯陽功效！所以，我唔單只狂食大葱，滾過大葱嗰煲湯我都一樣會飲埋。