最近喺網上發現，花都嘅高級富豪小區裏面，出現一啲專業女傭，佢哋斷鐘頭收費，每小時大約收八十蚊人仔，每次最少要幫襯三粒鐘，聽落都好貴吓，但原來呢批女傭，全部都係妙齡靚女，唔通係掛羊頭賣狗肉，實情係提供色情服務？
我哋嘗試聯絡佢哋嘅負責人，佢哋原來開業咗一年唔夠，主要係幫區內單身貴族嘅家居打掃衞生，由於近機場，所以附近有個大型商業區，有好多專業人士喺度上班，且大多數都係單身，急需家居服務，於是負責人就創辦咗呢間公司。問及主人同僕人之間，可唔可以發展成戀人呢？負責人話呢樣嘢好難控制得到，佢哋成日都要請人，流失率都幾高，至於係咪「埋街食井水」就真係唔知道。據知情人士透露，由於孤男寡女共處一室，特別容易有損失，而且好多時都係女方做主動，嗰啲冇乜接觸異性嘅單身貴族，好易失手被擒！
我哋喺網上搵到一位曾經做鐘點女傭，家陣做咗少奶奶嘅小真，問佢點樣認識佢丈夫？小真話：「主人平日要返工，根本好少機會會撞到，但我會幫佢做一啲家鄉小食，收工前寫張紙條叫佢食，佢食完之後，又會寫低紙條嚟傾偈，之後有日佢病咗，我上到去見到，於是悉心照顧佢，咁佢就要我做佢女朋友，後嚟仲發生關係，點知搞大咗個肚，於是咪結埋婚囉！」聽落好似好簡單，但據知情人士透露，呢啲女傭存心嚟釣金龜，所以出手又快又狠，唔少囡囡自動獻身，以肉體色誘佢哋，唔少單身貴族讀完大學就出嚟打工，好多都未拍過拖，所以女方一做主動，十個有九個都飛唔出佢哋嘅手指罅，囡囡話明三個月內要做到女友，半年內要結埋婚添！
啲囡囡除咗犧牲色相之外，其實仲有好多高招，例如明知主人放假，佢就會扮唔知道，上門假意邂逅，又或者借啲意喺主人出入嘅地方沖涼或者換衫，專登畀全相佢睇，但最常見嘅就係扮屋企等錢使，於是要問主人借糧，之後問題解決咗，就話無以為報，以身相許，仲要玩不設防，等主人一擊即中，於是奉子成婚，做其少奶奶！
撰文：小德