家陣潮流講綠色生活，而有人認為最綠色嘅生活，就係剝光豬，然後用全身去感受大自然。喺香港地少人多嘅地方，如果剝光豬走出街嘅話，唔單止會畀人由頭瞄到落腳，仲隨時因此而惹上官非添！故此，若然大家想享受呢種裸體，貼近大自然感覺嘅話，最好就係去外國，順便到溫泉浸一浸，咁就精神為之一振啦！
呢個位於美國加州嘅「Sea Mountain Spa Resort」，唔係一間普通裸體度假村咁簡單，喺2001年嘅時候，佢更得到全球最佳浪漫裸體及日光浴酒店嘅大獎，可想而知去呢度充電，唔單止可以用身體感受大自然，仲可以得到非一般嘅享受，對於識歎識玩嘅玩家嚟講，絕對係一個好去處！
玩家如果想去呢個度假村疏乎嘅話，可透過電話及電郵預訂房間，然後有專車喺拉斯維加斯接載玩家入住度假村，交通相當方便。玩家入到去後，就可以即刻剝光豬曬太陽、浸溫泉之餘，仲可以參加度假村內所舉辦嘅野火會、派對、音樂會及比賽等節目，既可同一眾同道中人分享裸體嘅樂趣，仲可以識多啲朋友添！雖然呢個度假村係鬆弛神經嘅好去處，但玩家要留意，度假村只係招待十八歲以上人士，未夠秤係唔畀入場嘅！
撰文：豪