廣州舉行大型運動會，大家都好擔心掃黃會掃得更厲害，但據啲北行老友報料，呢輪反而十分平靜，原來好多地方嘅警力，都抽調晒去廣州幫手。咁又係，一場中日大戰嘅足球賽，都要動員幾千人，單係廣州警力，未必應付到日後咁多賽事，勢必要調動附近城鎮嘅警力增援。鄰近城巿有關方面少咗人手，仲要保持日常治安工作，所以仲邊有人手嚟進行掃黃呢？
有見及此，有部分拉咗閘嘅夜場老總話，佢哋會再次大張旗鼓做生意，家陣已經積極聯絡舊將回巢，至於呢個如意算盤打唔打得響，真係要拭目以待。但以上海世博經驗，有關方面都係喺會期前大肆掃蕩，掃到啲夜場怕晒，但一開幕之後，佢哋就再冇乜特別行動，所以夜場老總嘅算盤，真係有可能打得響。但大家上去玩，一切都係小心啲好！
撰文：大軍