手提電話款式愈出愈多，令到呢個市場都活躍起嚟，你求其拎部電話去放，隨時可以收番一千幾百，所以好多缺德嘅人執到電話都會拎去賣，藉以賺番一筆。最近同幾位老友出嚟飲茶吹水，佢哋都話北上尋歡作樂嗰陣，都曾試過唔見手提電話，有啲仲話啱啱出咗部貴價輕觸式手機，點知用咗唔夠三日就出事，五千銀就咁見財化水。
聽見老友咁講，我大軍都戥佢哋慘情。講真句，大家北上嗰陣，認真要小心手提電話等財物，事關萬一唔小心遺失，之後再返去間場度搵，通常十次有九次對方都話冇見過。仲記得身邊有個朋友去骨場食快餐，之後發現自己部電話唔見咗，於是拿拿聲返轉頭搵，點知場方嘅工作人員好堅決咁話冇見過，當朋友話要入房自己搵嘅時候，對方就以房間要消毒而拒絕佢嘅要求，朋友亦奈佢唔何，於是就走人。至於部電話去咗邊？唔使多講，相信大家都會估到！唔想得不償失，就算玩得幾高興，都要記得好好保管自己嘅財物呀！
撰文：大軍