家陣去派對玩，囡囡最興着啲乜嘢款式嘅衫出席呢？原來唔係性感晚裝，亦唔係牛記笠記，而係「Teen衫」，即係啲廿到尾接近三十頭嘅囡囡，仲着住十五、六歲嘅少女服裝，有啲仲紥埋辮仔，夠晒青春活潑！啲囡囡話着成咁去玩，至會有感覺喎！
有近十年統籌女性狂野派對經驗嘅蓮娜，對囡囡出席派對嘅衣服最有研究。佢話：「以前去派對玩，為咗凸顯身份，好多囡囡都會鬥着名牌性感晚裝嚟扮淑女，希望畀人感覺佢哋就算出嚟玩，都係玩得好有品味同高檔，但其實狂野派對唔狂野就唔好玩，佢哋玩到好冇癮，最後紛紛改着牛記笠記，一來夠舒服，二來可以掩飾自己身份。」
點解要掩飾身份呢？原來啲舞男好好眼力，着得好靚嘅囡囡，佢哋會特別落力服務，啲囡囡就係唔想啲舞男對佢哋太好，怕會意亂情迷，泥足深陷喎！於是着牛記笠記打扮成普通人，玩完拍拍屁股就走，玩得唔開心仲可以大講粗口，掟吓嘢發洩都仲可以。
但點解近年又興着「Teen衫」呢？蓮娜話：「囡囡話着牛記笠記嚟狂野，好玩係好玩，但少咗份罪疚感，唔似細個時去派對玩，就算飲杯酒已經好驚青，唔好話有人搞佢哋，所以為咗追求番呢種罪疚感，好多囡囡都着番晒少女時代嘅衣服嚟玩。」
囡囡着上少女服裝，雖然已經年近三十甚至更大，但外表睇起嚟又真係後生咗好多，真係連心境都變埋，變得特別開朗，於是玩起嚟特別狂野，只要舞男一出場，就好似小粉絲咁又叫又跳，令現場氣溫升高不少，而且最先瘋狂衝上台爭奪舞男嘅，往往都係佢哋。蓮娜話：「着咗少女服裝嘅囡囡，唔知點解膽都會大啲，經常主動出擊，好多舞男都話怕晒呢班紥起辮仔嘅囡囡。」
撰文：小德