近年海外嘅狂歡派對，好多都同贊助商拉上關係，例如酒類、化妝品等，而今次介紹一個別開生面嘅贊助派對，就係健身中心之夜，大家都見唔少佢哋點樣做宣傳，但用狂歡派對嚟宣傳，係咪從未見過呢？據講過程成功、好玩，仲十分香艷添！
今次贊助派對嘅健身中心，係一間喺美國好大型嘅連鎖健身中心，最近為咗吸引更多女士加入，於是喺加州搞咗個健身中心狂歡之夜嘅派對，邀請城中名媛淑女出席，同時亦有好多白領族同學生妹參加。至於點解咁吸引，因為佢哋搵嚟全國著名嘅舞男團隊出席，到場觀眾除咗可以一睹佢哋大跳脫衣舞嘅風采，如果係大會貴賓，仲可以嚟個近距離深入接觸，聽見都令人開心。
呢批舞男除咗個個大隻之外，仲出晒名夠靚仔，而且作戰能力高，可惜一直喺東岸搵食，呢批西岸嘅淑女們早就聽過佢哋嘅大名，但一直冇機會作深入接觸，於是大會決定重金禮聘佢哋嚟加州參與盛會，宣傳一出街已經引起搶購門票嘅熱潮。
而大會亦好有準備，要班舞男咪咁快剝光豬嚟餵啲中女，要佢哋喺舞台上利用贊助商提供嘅健身器材，多做一啲健身時嘅誘人動作，呢班舞男喺划艇機上一划，全場囡囡即時尖叫，舞男亦好醒目咁捉咗幾位囡囡上台，等佢哋一邊做健身，一邊畀囡囡驗明正身，睇吓啲肌肉係咪特別勁，有個囡囡一摸，興奮到昏迷不醒，你都咪話唔誇張。
最後舞男將所有器材都介紹完，如狼似虎嘅囡囡立即一擁而上。可憐佢哋啱啱做完表演，轉頭又要飽受囡囡嘅攻擊，但好彩訓練有素，於是勉強滿足晒佢哋嘅要求，各方面都心滿意足地離開，事後囡囡大讚健身完嘅肌肉特別有爆炸力，日後除咗自己參加，仲會叫埋男朋友一齊去，足以證明今次派對十分成功。
撰文：小德