強仔：小弟早幾個月前透過朋友介紹，認識咗現時嘅女友，我哋相處得相當融洽，性生活亦非常愉快，之不過我每次同佢出街都會唔多開心，事關女友愛穿着性感服飾，屋企衣櫃淨係得熱褲、短裙同小背心，坦胸露臂已經算小兒科，最離譜係佢鍾意唔戴Bra，甚至唔着底褲，搞到出街嗰陣，街上嘅麻甩佬眼甘甘咁瞄住，作為男友嘅我，有時睇見咁嘅情況真係覺得好嬲。究竟我應該點做，先可以令佢改變呢個衣着習慣呀？
小花：我覺得你先要話佢知，唔着底褲係非常唔衞生嘅事，至於唔戴胸圍嘅話，胸部長期冇咗承托，就有機會出現下垂嘅情況，相信佢聽見之後，自然唔會再真空咁出街。
老周：其實強仔你應該好好咁同女友傾吓呢個問題，向佢講出自己嘅感受，如果女友最後都唔想改變自己嘅衣着習慣，咁你惟有認命，睇開啲，免得每日都要為佢而勞氣，好傷身架！
大笨占：想解決問題，都唔係冇辦法，例如你可以同佢講，家吓紫外線指數咁高，露出咁多肉會好傷皮膚之餘，仲好易起雀斑，如果佢係一個貪靚嘅人，應該會自動自覺着番件有袖衫。