問：我最近上去深圳幫襯休閒中心，點知正想埋單時，天文台發出黑雨警報，主任叫我唔好走住，喺大廳坐坐。我以為唔係好大雨，於是埋單走人，點知一落街，大雨大到舉步難行，一轉出街口，更成條大街變成汪洋，最後決定退回休閒中心。主任好熱情咁招呼我返入去坐，於是又換衫坐番入廳度睇電視，當黑雨停止，正想走人嘅時候，點知收銀要我畀錢，我話乜嘢都冇做過，而且係主任叫我入去坐，點解要收錢？個收銀話公司規定齋坐大廳就要收大廳費，最後屈咗我八十蚊，真係唔抵呀！請問我究竟要唔要畀錢佢嘅呢？
答：如果你未埋單，喺裏面再坐一陣，係唔使收錢嘅，但如果你埋單之後再返入去，就算乜嘢都冇做，個場係可以收你最低服務費。至於名目係乜嘢，間間場都唔同，但一定唔會畀你白坐，因為呢間係休閒中心，怕畀啲人白撞走入嚟沖涼，然後坐喺大廳乜都唔做。為咗保障自己，所以都設有入場最低消費，所以一定係要畀嘅。至於你當時情況，應該唔好埋單住，先放低銀両喺櫃枱，落街睇睇情況，如果可以走就走人，唔可以走人就返上去，咁咪唔使畀多一次錢囉！
撰文：小德