脫星係咪個個都貪慕虛榮？未必，喺美國一位叫Aubrey Taylor嘅新進脫星，佢嘅志願居然係開農莊，為咗盡快實現理想，於是走去剝衫同男優喪砌，認真有計劃！
冇去偷又唔係去搶，阿妹純粹想開農場，養吓牛種吓花，但就被外界一面倒笑佢天真兼虛偽，難得當事人樂觀面對，更從事件中更加肯定自己思想係正確嘅！Aubrey Taylor話：「自小就希望開農場自給自足，享受悠閒無壓力生活，但因為財力有限，惟有先儲錢日後再實現！」奈何儲錢嘅速度追唔過通脹，阿妹左計右計，最終認為只有做脫星搵錢最快，於是毫不考慮就為成人雜誌剝衫拍寫真，之後順利加入四仔界做脫星。
有傳阿妹簽約時，講明乜都可以玩，但片酬就一定冇得減，阿妹話：「我清楚自己定位，希望搵夠開農場嘅錢就走，而一般女性加入脫星界目的係名成利就，享受成為性幻想對象，因此我有需要同公司講明，無謂畀對方捉錯用神，將我捧上神枱！」雖然阿妹一心想搵夠就走，但有人就借題發揮，唱阿妹其實係貪錢，用玉女嚟包裝自己咁話！
面對外界流言滿天飛，Aubrey Taylor一直冇公開澄清，只係按本子辦事，有戲就拍，有相就影，甚少出席公開場合爭人氣，有影迷非常支持阿妹嘅做法，可惜公司就認為佢自毀前程，有意將佢放入雪櫃，事關公司覺得以Aubrey Taylor嘅條件，絕對有力再上，家陣阿妹唔出席宣傳活動，變相令公司有錢都賺唔到。有人更擔心阿妹滿約後過檔，一腳踢走舊公司，依家即係變相幫人湊女。呢種情況喺四仔界屢有發生，喺出道扮神秘吊影迷胃口，到要續約時至企出嚟扭計。
公司賺少咗，當然有人唔順氣。不過阿妹一於少理，最近替某成人網站拍咗輯性感寫真，仲喺農場取景，以示不滿。阿妹更表明，除非有公司願意出天價請佢，否則對開農場志願絕不動搖。
出生日期：1982年11月23日
三圍：34 C、23、33
身高：5呎5吋
撰文：德