日本三大AV製作公司之一嘅Max-a，最近有位女優突然引退，因而令好多計劃都失晒預算，照計大公司成日都有女優引退，應該冇乜影響至啱，但原來今次引退嘅女優，事出太過突然，可以話毫無迹象，而且話走就走，令咁大間公司都亂晒陣腳。
呢位令公司陣腳大亂嘅女優，原來就係伊東遙，阿女加盟公司剛剛兩年，先前至替佢搞咗個大型嘅兩周年慶祝會，點知喺六月中就突然由經理人事務所向公司提出解約，而且即時生效，仲話係完全出自個人嘅決定。
咁大件事，當然引起媒體嘅注意，事務所負責人於是出嚟解釋：「伊東遙已經搵到將來嘅夢想，所以決定終止一切工作，而且意志非常堅決，相信未來都唔會再復出，而且伊東遙對無法親自向影迷告別，深表遺憾，喺度只能衷心感謝大家一直嘅支持。」呢篇通告一出街之後，引起更多人對伊東遙引退嘅揣測，因為如果要轉行，照以往慣例，女優一定會乘機造勢，絕對唔會咁低調。
有網友就話伊東遙其實唔係要轉行，而係要嫁人，所以將自己嘅引退低調處理，甚至有人懷疑伊東遙已經珠胎暗結，所以更加要快啲匿埋，免得畀人發現。而進一步推測，更有可能經手人係社會上嘅知名人士，於是媒體翻天覆地咁搜集伊東遙嘅緋聞，可惜一直未有發現。但無論引退原因係乜，伊東遙引退已經成為不爭嘅事實，一眾佢嘅粉絲，只能不斷重溫佢嘅舊作嚟懷念佢。
而舊公司Max-a，一於食得唔好嘥，將伊東遙嘅最後作品，安排為引退之作，而且定喺9月推出，更喺佢哋嘅官網大大版咁宣傳，令粉絲們熱切期待，希望最後大賺一筆。Max-a咁識得做宣傳，呢一仗就算冇主角都可以話穩贏冇輸啦！
撰文：小德