俗語話平嘢冇好，好嘢冇平，呢個係消費嘅不二道理，就連一般師奶兵團都會明白。之不過好多自命風流嘅男士，就經常忘記咗呢個道理。就算出去玩亦要不斷格價，更以為有機會食到又平又靚嘅囡囡，到中招之後先知道出事。
撰文：娟娟
作為消費者，梗係想以最低價錢買得心頭好，為自己嘅荷包着想。不過，對於一個嫖友嚟講，情況或者有所分別，如果你想以至抵嘅肉金，去換取最大嘅快感，唔係話冇可能，但隨時要預咗撞板咁解。
現年二十二歲嘅阿勇，早前因為工作關係，經常廣港兩邊走，間中亦會喺廣州逗留兩三晚。一個二十出頭、血氣方剛嘅年輕人，加上內地四圍燈紅酒綠咁多誘惑，難免有衝動想去玩。有一次，阿勇透過身邊嘅朋友得知某幢商廈後面有鳳樓，於是懷住滿腔慾火去試。上到去，果然見到唔少黃色架步。正當阿勇慎重咁考慮幫襯邊一個小姐嘅時候，有一個四、五十歲嘅阿姐走埋嚟。「呢個阿姐走埋嚟問我鍾意啲乜嘢類型嘅女仔，又問我有冇興趣去佢個竇度睇吓啲女啱唔啱心水。見佢咁有誠意，加上好奇心驅使，我便應承佢。」阿勇表示，之後佢同對方去到另一個樓層，該處嘅囡囡數目比較多，而且設有四、五間套房，似乎作炮房之用。
該名阿姐從房中叫咗幾個女仔出嚟，喺揀女期間更落嘴頭向阿勇推介，仲話啲小姐全部都係大場出身，所以質素上乘，除咗短聚之外，亦可以選擇長包。阿勇續話：「嗰個阿姐話，長包一個月就約二千五蚊，我見成日都會返廣州，酒店錢都唔少啦！呢個包養服務又有地方住，真係帶條底褲就可以入伙，仲有小姐貼身服侍，價錢真係好抵，所以就包養咗個湖南妹囉！當然，一次過畀咗咁多錢，梗係要玩盡啲，有時放假上到去，我就同湖南妹日以繼夜咁做，就算安全套用晒都照樣打真軍，點知就係咁樣出事。」
過癮咗兩個星期，阿勇終於知道出事，事關佢發覺自己惹上一身性病。當打電話問嗰個湖南妹先知，其實對方喺舞廳做嘅時候已經患咗性病，而為咗搵錢醫病，所以就以平價吸引客人包養。
早前內地網絡驚現號稱中國最大富豪包養網站，聲稱專門為單身富豪、型男美女提供相識平台，同時為佢哋擬定私人助理勞動合同，並列出被包養一方嘅工作內容，當中包括對外聯絡、日程安排、形象打扮、生活起居護理等，月入達八萬元以上，同時又強調被包養人士冇義務提供性服務。仲話網站嘅會員數量已有五十餘人，而且唔係富豪級人馬就係俊男美女，認真誇張。因此有人質疑該網站利用虛假資料進行詐騙，並呼籲有關部門取締。