好多男人表面正直，但竟然瞞住太太出去滾，當東窗事發時，太太還不敢相信。其實會唔會偷食，古人早有定論，今日就同大家談談邊啲面相嘅男人，最愛瞞住老婆去偷食，等各位女士可以多加防範。
如果男人嘅眉毛又濃又密，表示好色又怕妻，但要睇埋配乜嘢面形，如果配粗獷嘅面相，咁就反而會冇事，會守喺老婆嘅身邊；但如果配清秀嘅面孔，呢種男人會深得老婆嘅信任，加上自身桃花超多，經常都會有美女喺身邊，所以極容易會感情出軌。
其次鼻頭肥大，加上眼大有神，笑起嚟有魚尾紋，呢種男人嘅性能力本身就已經超強，往往一個女人都無法滿足佢哋，加上做人圓滑乖巧，對太太做足表面工夫，但只要一有空檔就會出外偷跳，而且回家再交功課都冇問題，可謂神不知鬼不覺。
第三種要留意嘅，就係嘴唇薄而講嘢時嘴偏埋一邊嘅男人，佢哋本身就係花心蘿蔔，而且一見到靚女就會主動出擊，加上口才了得，樹上嘅雀仔都可以氹到落嚟，要呃個老婆出去快活，一啲都唔成問題。假如老公係咁嘅嘴形，真係要小心啲！
最後就係眼頭位置生咗粒痣，呢種男人比較內向，有嘢唔會同人講，乜都收埋喺心裏面，如果性生活出現問題，佢唔會講出嚟搵大家解決，反而會向外搵其他女人尋開心。由於平時粒聲唔出，其實滾到開巷，老婆仲懵然不知呀！
撰文：小德