提起內地夜遊，好多人都一定會諗起夜總會同桑拿，不過落酒吧溝女亦係唔少人熱愛嘅活動，因為過程要花心思，溝到手之後嘅成功感絕對強過明買明賣。當然，溝唔到就梗係有多少失落感啦！最近有酒吧就玩幽暗派對，保證客人一定可以帶女上房。
世盃結束之後，唔少酒吧都要面對短暫嘅淡季，要等四大聯賽開波，先可以再見到人頭湧湧嘅情況。為咗喺呢段時間改善生意額，好多酒吧老闆都要諗計，內地嘅酒吧亦係一樣，而佢哋推出嘅招數就係大搞不同主題活動，例如絲襪之夜、兔女郎之夜，甚至係水着之夜等等，最重要都係女士收費全免，以吸引更多女性客人入場，有咁多女仔出現，想班男士唔入場幫襯都幾難啦！
另外，除咗主題活動，好多酒吧老闆都會特別搵網民上各個討論區發起交友活動，而呢類活動有時亦有特別玩法。好似最近長沙一間酒吧咁，就玩黑燈交友派對喇！何謂黑燈？即係一班網民出嚟先見個面，飲吓酒之後，然後大家就走出舞池，由酒吧職員熄燈，或者將燈調節到幽幽暗暗。呢個時候，大家就可以在黑暗之中，捉住意中人隻手仔，用語言、肢體接觸去探索自己嘅真愛。
發起人表示呢種黑燈交友派對，可以幫助大家拋開外表，更加可以了解到彼此間嘅內涵喎！不過，唔少試過嘅男士都表示，其實佢哋參加嘅目的，除咗溝女之外，最重要都係為咗抽水，因為喺冇晒燈光嘅情況之下，點摸都得，如果摸到重要部位畀對方叫停，亦可以推說話「睇唔到，摸錯都冇辦法啦！唔好意思呀！」對方冇可能會怪你！
然而，除咗正正經經嘅網民參加之外，其實呢類交友派對有唔少囡囡出嚟搵食，實行渾水摸魚。班囡囡於漆黑環境之下主動捉住男方隻手，繼而攬到實一實，用自己嘅體溫撻着對方，再加上喺耳邊講幾句挑逗說話，好容易就可以令對方心郁郁，繼而雙雙走到附近嘅酒店開房，上到房臨入閘先講價錢，到時對方已經如箭在弦，想唔畀錢幫襯都唔得啦！
有部分酒吧嘅老闆都知道有囡囡藉黑燈交友派對搵食，但係班囡囡同正常女仔好難分別，而且有囡囡出現又真係可以吸引更加多男客入場，所以老闆直情同佢哋傾埋點樣分帳仲好，令交友派對變相成為賣肉派對。
撰文：賢