問：本人最近退休，一直嚮往神州大地嘅景色，當然美色都唔會放過，所以想返內地旅遊，但去到人生路不熟嘅地方，乜都唔驚，最怕畀人打劫，又萬一畀人打劫而失去證件，咁應該點算好呢？應該即時喺當地報警，定係返香港至報失呢？
答：你嘅證件喺內地無論係被打劫、小偷偷咗，定係大頭蝦自己遺失，最好都係先喺當地公安單位報失，向公安機關攞番張報失證明，如果你嘅行程係要即日離開，你可以講低行程或留低聯絡電話，如果佢哋神通廣大搵得番嘅話，就會聯絡畀番你。
如果一直都搵唔番，得張報失紙係過唔到關，你要去火車站二樓嘅中旅深圳接待聯絡部辦個一次性嘅「入出境通行證」，俗稱「臨通」嘅證件，咁你至可以憑證過關，返到香港你要再去入境處同中旅社辦遺失身份證同回鄉卡嘅手續。
但要辦「臨通」，除需要護照相外，仲要回鄉卡嘅副本，同埋報失者有相嘅證明文件，例如身份證，但唔見得回鄉卡大多數都會冇埋身份證，咁就一定要護照，大可事前叫家人攞上深圳，如果唔係神仙都幫你唔到。
撰文：小德