早前先講人仔升值，港紙又遭殃，原來不只夜場驚，連外圍都發惡。賽事期間同玩家北上夜總會睇波，其中幾位死士仲未知驚，夠膽喺夜場內向外圍投注，仲聲大大話：「邊有咁易拉到吖！」好在我大軍對賭冇興趣，否則唔只驚輸波，仲怕攬女期間突然畀執法部門撞門而入就弊傢伙！
雖然班賭徒玩得興奮，但言談間就抱怨外圍佬拒收港紙投注，事必要人仔結算。賭徒話：「外圍人仔結帳早已存在，有啲彈性大嘅會買港紙賠港紙，但家陣內地一律以人仔做單位，好似啲港紙有菌咁喎！」更有玩家表示，依家內地外圍好似唔憂做，有賭徒就試過喺電話同佢哋理論港紙同人仔有乜嘢唔同，但結果仍是畀人拒絕，仲叫佢返香港馬會賭喎！賭徒玩得勞氣，但為咗方便，一樣要忍氣吞聲，未贏錢先輸咗個勢，何必呢？
撰文：大軍