古代人娶妻除咗要夾生辰八字之外，有時仲要搵師傅睇睇女方嘅面相，如果合乎要求，咁至會談婚論嫁。咁憑乜嘢傳統要求嚟定女方嘅好壞？原來有所謂不貞、不育同埋不安，真係唔講都唔知。
所謂不貞，顧名思義，就係千祈咪揀啲淫蕩嘅女子，呢方面嘅話題特別多，例如眼睛生成三角形，嘴巴常常張口，笑嘅時候露晒啲牙肉，呢啲據講都係淫婦嘅面相特徵。另外，如果頭髮天生卷曲、乳房細小、肚臍淺凸，亦都係多淫之相，會有紅杏出牆嘅可能。
第二係不育，古時娶妻最重要嘅目的，就係要開枝散葉，正所謂不孝有三，無後為大，所以就要睇清楚女方係咪好生養。如果面形圓潤，胸部豐滿，臀部有肉，呢啲都係好生養之相。
最後係不安，古時做妻子嘅要懂得安守本分，做好自己嘅工作，但有些女士的面相顴骨高凸，代表做事太過有能力，不只持家有道，而且連丈夫在外嘅事務都要管理，相書稱呢啲叫做妻奪夫權，試問佢老公嘅顏面何存，所以點都要搵個安分守己嘅妻子至好。
撰文：小德