曾聽過一位資深蒲友話，做好人唔係唔好，不過就唔好諗住一定有好報，尤其當你身處內地，更加要小心為上。事實上，不法之徒往往利用別人嘅同情心，趁機做出一啲偷呃拐騙嘅事情，唔想中招就要打醒十二分精神喇！
話說老友阿賢有晚同朋友北上飲酒兼睇波，去到深圳一條酒吧街，佢哋求其搵咗一間人流較少嘅場落腳，玩到深夜時分，原本打算回港，但朋友話想揼骨按摩，順道喺埋骨場過夜，於是兩人步行前往附近嘅骨場。
途中朋友突然人有三急而走開一會，等待期間，阿賢見到有個女仔醉醺醺咁喺某間酒吧行出嚟，由於類似嘅情況喺呢區，特別係酒吧街都會經常發生，所以初時都不以為意，點知行多兩步，就見到嗰個衣着性感嘅少女跌咗落地。阿賢諗住做好心，走埋去扶佢起，點知個女仔彈起身，話佢想非禮。就喺呢個時候，阿賢身後有個後生仔行埋嚟，質問佢做乜非禮佢女朋友。
「睇見呢個男人兇神惡煞，我已經心知不妙，之後佢仲話要我作出賠償，否則我就會有麻煩，幸好喺呢個時候朋友啱啱返嚟，對方見我哋有人喺度，最後惟有知難而退。」阿賢話，後嚟愈諗愈驚，擔心對方會折返報復，於是決定立即回港。
原本一心諗住幫人，最後反而畀人屈佢非禮，確實令人意想不到，就阿賢嘅遭遇而言，幸好當時有朋友可互相照應，咁先可以安全甩身，但如果情況有變，例如對方不只一個人，又或者手持武器，咁就真係有排頭痕嘞！
雖說北上消費係一個唔錯嘅選擇，但亦都要打醒十二分精神，不只喺夜店入面，就算喺夜店林立嘅街道都一樣，事關呢啲地方通常都係龍蛇混雜，再加上不法之徒嘅手段層出不窮，往往令人防不勝防。老實講，做好心真係要睇環境，唔想無端端被屈一筆錢，都係要事事小心啲好！
撰文：娟娟