家吓日本少女組合AKB48喺藝能界紅到發紫，成績有目共睹，當中部分成員更有望獨立發展，好似呢次嘅主角柏木由紀，無論唱歌或做主持都一樣咁受歡迎，而且每次推出寫真集都能夠大賣，難怪一直人氣高企。
撰文：娟娟
出生於鹿兒島嘅柏木由紀，上年為日本一間電視台嘅節目擔任天氣女郎，從此令佢知名度急升，所屬公司隨即食住個勢，為佢推出首本個人寫真集《以上，柏木由紀》，結果大賣特賣，更成為全年偶像寫真銷量冠軍，氣勢可謂一時無兩。由紀妹能夠喺眾多成員之中脫穎而出，梗係有佢嘅原因。先講外表，雖然呢位妹妹仔唔算係大美人，之不過勝在樣貌夠晒「卡娃兒」，而且非常年輕，到七月中才滿十九歲，最重要係每次演出都能夠盡情發揮C奶魅力，再配合一個甜美笑容，自然輕易迷倒萬千宅男。
雖然索女咁受歡迎，但係都不能掉以輕心，事關藝能界競爭激烈程度非大家所能想像，淨係同門一班師姐師妹已經鬥得難分難解，為保人氣，梗係要繼續爭取支持者。而由紀妹家吓頻頻為電視及電台節目做主持，最近又推出全新寫真集Photo Card Magazine《PHOTORE vol.1 柏木由紀》，大玩制服誘惑之餘，又換上不同款式嘅性感比堅尼示人，一對奶王包依然勁吸引。據知，一萬多本寫真集推出冇耐已被影迷掃光，不但係銷量保證，更完全展示出佢嘅吸金本領。