一到夏天，新進女星都會把握機會，盡騷佢哋胸前嘅「事業線」，由於神奇胸圍日新月異，女星們嘅胸部可以要幾大就有幾大，但講到事業線就唔係要幾長就有幾長，所以喺大家都造假嘅情況下，事業線就有佢嘅獨特性，更可以從中了解星運！
據玄學家研究所得，一般女士胸部事業線嘅長度為三至五吋，如果只有三吋以下就視之為短，五吋以上就為長，我哋先講吓正常長度（四吋）嘅事業線，專家話佢哋會好識把握機會，懂得利用自己嘅優點去創造成功機會，唯一美中不足，就係專長有限，應該要不斷充實自己，令自己周身刀張張利，咁喺邊個圈子都會無往而不利。
至於不足三吋嘅話，專家話呢種囡囡，一般都多才多藝，唔會只得一種生存技能，所以佢哋較易上位。至於過長嘅囡囡，佢哋生存技能欠奉，大多數靠一招走天涯，如果熱潮一過，就想再紅都難。
另外要留意，事業線如果到了頂端，出現開叉，呈一個英文「Y」字形，呢種囡囡性格比較現實，做任何事都會斤斤計較，由於乜都唔捨得蝕底，所以發展會大打折扣，好多大胸靚女，突然間彈起之後，就無法再紅落去，大多係有此胸紋。
撰文：小德