北京最有名嘅夜場「天上人間」，早排因為畀人放蛇斷正，所以勒令停業整頓，生意自然冇晒，而一眾伙記，更可能要惹上官非。講起官非，可能仲多一單嘢跟尾，就係佢哋嘅官方網頁，竟用咗名模嚟做封面，人家得知，誓要以法律討回公道。
話說呢位被人侵犯肖像權嘅靚女，係嚟自湖北嘅林柯彤，阿女今年22歲，身材火辣，最初由網模做起，只要一講起「小龍女彤彤」就會無人不曉，出道多年，家陣已躋身人氣模特兒行列，彤彤除咗做模特兒工作之外，近年更進軍影視圈，接拍電視劇，好似最近重拍嘅《西遊記》，佢就有份演出，前途可以話係無可限量，今次遇上呢單嘢，真係影響深遠。
據報道指出，彤彤一直都唔知道自己嘅照片放咗喺「天上人間」嘅網頁上面，佢話呢輯相，係喺07年替一間影樓拍攝嘅宣傳照，之後曾經流傳喺網絡上面，一直不以為意，但自從「天上人間」被查封後，就多咗網友登入佢哋嘅網頁，於是發現事件。
當彤彤知道自己嘅照片，被用嚟做夜場生招牌時，當然又氣憤又着急，由於夜場已經被整頓，所以一直聯絡唔上負責人，深怕照片會一直貼喺網頁上，於是急召傳媒嚟澄清，消息報道後，網頁終於刪掉彤彤嘅照片，總算不幸中嘅大幸。
有網友細睇落去，除咗網頁封面造假，亂貼藝人照片，原來連囡囡一欄都係假嘅，當中唔少照片係從電視台嘅選美節目中盜取落嚟，好多未來新星變咗做夜場小姐都唔知，真係畀佢哋累死，所以網友都嚴加聲討，更希望有關方面要對夜場網頁多加留意，為免更多無辜嘅人受到傷害，更有網友話如果夜場被封，最好連網頁都封埋，希望有關方面考慮一下！
撰文：小德